Мақал-мәтелдер | Денсаулық

Көп ауырған ем табады,
Көп адасқан ел табады.

Күрек тісің сынса,
Күлкің бұзылады.

Жаны ашымастың қасында
Басың ауырмасын.

Ауру аяқ астында,
Арылу жиде басында.

Дәрі шөптен шығады,
Дана көптен шығады.

Боранын бұрқыратқан қыстан,
Сай-сүйегіңді сырқыратқан
Сары уайым жаман.

Қотырды қаси берсең қаны шығар.
Киізді қаға берсең шаңы шығар.

Соқырдың қолына түспе,
Саңыраудың астына түспе.

Таздыңтарағы алтын,
Мергеннің садағы алтын.

Көбікті қарда түлкі ойнар,
Көңілді көзде күлкі ойнар.

Ауру жайын баққан біледі,
Аңның жайын атқан біледі.

Үш нәрсенің алдынал:
Аурудың алдын ал,
Жаудың алдын ал,
Қайта қозған даудың алдынал.

Біреуге өлім тілегенше
Өзіңе жүрім тіле.

Тісі ауырғанның көңілін сұрамайды.

Өлім деген ойран,
Өмір деген майдан.

Кесел батпандап кіріп,
Мысқылдап шығады.

Жас жігіттің жарасы,
Жол-жөнекей жазылар.

Алты қатын азаға келсе,
Әр қайсысы өз мұңын
Айтып жылайды.

Бірге тумақ бар,
Бірге өлмек жоқ.

Біреудің ажалы оттан,
Біреудің ажалы судан.

Сырқат тән жарасы,
Қайғы жан жарасы.

Қартайғанда тістен тынарсың,
Тістен тынсаң, іштен тынарсың.

Ұйқы — тынықтырады,
Жұмыс — шынықтырады.

Айғыр аурудың емшісі алдынан шығар.

Өлінің тілін тірі алмас.

Аурудың жақсысы жоқ,
Дәрінің тәттісі жоқ.

Тер шықпаған кісіден,
Дерт шықпайды.

Басы жұмыр пенденің
Барар жері белгілі...

Орта жолда атың өлмесін
Орта жолда қатының өлмесін.

Адам өмірге
Иықтап келеді,
Кетерінде «ұйықтап» кетеді.

Өлсең көрің көң болсын,
Тіріде терің кең болсын.

Жылан шаққан адам,
Ала арқаннан аттамайды.

Ажалды жылан, жол үстінде жатады.

Тостағандай басымда
Тоғыз жара.
Жұдырықтай жүректе
Жеті жара.

Білімнен қымбат досың жоқ,
Аурудан бетер қасың жоқ.

Ұстағанша жүз дәрігерді қайдағы,
Тамағыңды шақтап ішкен пайдалы.

Тәтті-дәмді мың болар,
Денсаулық деген бір болар.

Денсаулықпен тең түсер досың жоқ,
Дерт-кеселмен тең түсер қасың жоқ.

Өлердей ішіп омақата құлағанның обалы өзіне.

Ақшаны оңай табарсың,
Саулықты қайдан аларсың?!

Әуелгі байлық — ден саулық,
Екінші байлық — он саулық,
Үшінші байлық — ақ жаулық.

Денсаулық — зор байлық.

Жарлының байлығы —
Дәнінің саулығы.

Жан ауырса тән азады,
Қайғы басса,' жан азады.

Айдалада атқан оқ
Ажалдыға тиеді.

Жеңіл барып, ауыр қайт,
Аман барып, сау қайт.

Бас аманда мал тәтті,
Бас ауырса, жан тәтті.

Аяншақ көзге шөп түскіш.

Мақал-мәтелдер: Денсаулық – зор байлық