Ана тілің – біліп қой, -
Еркіндігің, теңдігің.
Ана тілің – біліп қой, -
Мақтанышың, елдігің.

Басқа қамың түк емес,
Тілдің қамы тұрғанда.

Тілің болса, үнің бар,
Тіл болмаса, түгің жоқ...
Қадыр Мырза Әлі

Тіл қаруы – сөз, сөз қаруы – ой. Ақылды ой, алғыр сөз – адамның ең жоғары қасиеті.

Тіл күшіне өлшеу жоқ, тіл көркемдігіне теңеу жоқ. Тіл өлгенді де тірілтеді... Әдебиет әдебиет болғалы тіл қасиетін ешкім сарқа пайдаланған емес, мойымайтын кен.
Ғабиден Мұстафин

Тіл жоқ жерде ұлт жоқ.

Тәрбие басы – тіл.

Ана тілі – халық болып жасалғаннан бері жан дүниесінің айнасы. Өсіп-өніп, түрлене білетін, мәңгі құламайтын бәйтерегі.
Жүсіпбек Аймауытов

Ана тілін жақсы біліп тұрып, төтенше жақсы сөйлесең, бұл сүйеніш, ана тілін білмей тұрып, бөтенше жақсы сөйлесең, бұл – күйініш. Өз тілін білмей тұрып, жат тілге еліктей беру – зор қате.
Халел Досмұхамедұлы

Білімдімен дос бол,
Сасқанда ақыл береді.

Бала болсаң болғандай бол,
Ағайынға қорғандай бол.
Мөңке би Аманұлы

Әдепті қыз, ақылды ұл –
Өкпе-бауыр, жүрегің...
Байсерке абыз

Байдалы би:
- Алыста не алыс?
- Тәттіде не тәтті?
- Жақында не жақын? –
деген үш сұрағына Мұсаның қайтарған жауабына қанағаттанбай:
- Білімді мен білімсіздің арасынан алыс жоқ;
- Жаннан тәтті жоқ;
- Ажалдан жақын жоқ, - деген екен өзі.

Өсиетке терең бол,
Өсек сөзге керең бол.

Атаңның ботасын алма,
Батасын ал,
Бота өліп қалады,
Батадан бағың жанады.
Есей би Алдамұратұлы

Балаңның жығылғаны да, жылағаны да өзіне сабақ.

Баланы жастан жұмсап, жүгіртіп істете беру керек. Еңбекшіл азамат содан қалыптасады.

Бала тәрбиесінің ең үлкені – оны еңбекке баулу. Еңбекшіл жас қана ең үздік азамат болып қалыптасады.
Әзілхан Нұршайықов

Білім – қымбат қазына,
Қанағат тұтпа азына.

Жалқаулық аздырады,
Еңбек оздырады.
Мұзафар Әлімбаев

Ұстаздық ету – уақыт ұту емес, өзгенің бақытын аялау, өзіңнің уақытыңды аямау. Бірақ бұған өкінбеу керек. Жер үстінде адам тәрбиелеуден асқан абыройлы іс, ардақты эұмыс жоқ. Ұстаздық – ұлы нәрсе.
Зейнолла Қабдолов

Құлақ екеу, ауыз біреу.
Ол не үшін бұлай?
Көп тыңдап, аз сөйлеуге жаратқан оны Құдай.
Ауыз біреу, көз екеу – ол не үшін бұлай?
Көп көріп, аз таңдануға жаратқан оны солай.
Ауыз біреу, қол екеу – ол не үшін бұлай?
Көп жұмысшы, аз жеуші – жаратқаны ол солай.
Ахмет Байтұрсынов

Анамыздың ақ сүтімен бойымызға дарыған тілімізді ұмыту – бүкіл ата-бабамызды, тарихымызды ұмыту.

Білмей тұрып билік айтудан аулақ болғын.

Өз ұлтын сүю - өзге ұлтты жек көру емес.

Отан үшін күрес – ерге тиген үлес.

Ел үшін аянба – ерлігіңе сын,
Жұрт үшін аянба – жігіттігіңе сын.

Әрбір азамат өз ұлтын сүюге тиіс және өз ұлтына деген терең сүйіспеншілігі мен мақтаныш сезімі арқылы басқа ұлттарды танып, құрметтеп, оларды сүйе білуге тиіс.

Шындық – бұл ерлікке тәрбиелеудегі ең бір құнарлы құрал.

Үйрете отырып, үйрену ғана жеміс береді.
Бауыржан Момышұлы

Білімді болуға оқу керек. Бай болуға кәсіп керек. Күшті болуға бірлік керек. Осы керектердің жолында жұмыс істеу керек.
Ахмет Байтұрсынұлы

Ел болам десең, бесігіңді түзе.

Мен өз жұмысымда сөз жоқ, Совет жазушыларының тәжірибесін пайдаландым.

Кітаптың бір мақсаты – агитация десек, кейбір шарттарды орындай отырып, оны да жүргізуге болады. Болмаса желігіп отырған жеңіл қолмен жазып жiберген жарнама дейді.

Біз ескі әдетімізді сүйеміз, сүюіміз дәлелсіз емес. Құрметтейміз, құрметіміз орыныз емес. Себебі, әдебиетімізде өзге жұрттың әдебиетінде жоқ нәрселер табылып отыр.

Ескі қазақ баласы, шынында, өлеңмен қарсы алынып, өлеңмен шығарып салынатын болған. Бұл қазақ рухына анық сіңген мінез еді.

Бүгінгі қанағаттанбаудың себебі, тіпті, бұл күнгі табиғатқа ырза болмағандық.

Күншығыстың діни дерті – религиозный митицизмде байқалады, ұлтшылдықта да сезіледі, болымсыз өнершілдік те көрінеді.

Қазақ өлеңіне үлгі, өрнек берген, түрін көбейтіп, қалыбын молатқан – Абай.

Әдебиеттің зор міндетінің бірі - елдің мінезін түзеу.

Қазақ әдебиетінің ішіне қазақ өмірін түгел суретімен алып кіру- әдебиеттің ендігі міндеті.

Жалпы адамзат қоғамының жаңа нәсілінің, асыл нәсілінің өкілі болуға жараған буындар туды дей аламыз.

Бүгінгі қазақ баласы – қырық жылғы қазақ баласы емес.

Адам өзгерумен бірге қауым, халық өсумен ілесе біздің өлкеміз де өзгерді.

Білген, көрген болмысынан туған шындық кітабы болып шыға алса, содан арғы зорғы мұраты жоқ.

Адамдықтың негізі - әйел

Ой да көп, уайым да көп - ойлай берсең,

Ой да жоқ, уайым да жоқ - ойнай берсең.

Өнерпаз болсаң - өр бол.

Бөрінің артынан бөлтірік ақылды болғандықтан ермейді.

Жігіт қадірі - өнерімен өлшенер болар.

Жалған намыс - қасиет емес, ар сақтаған - қасиет.

Жалынған - бас қорғау емес, жағаласқан - бас қорғау.

Берекені көктен тілеме - еткен еңбектен тіле.

Қай істің болсын өнуіне үш шарт бар: ең әуелі - ниет керек, одан соң - күш керек, одан соң - тәртіп керек.

Жақсылыққа жақсылық - әр кісінің ісі, жамандыққа жақсылық -ер кісінің ісі.

Адамның ең ұлы көркі - оның ақылы деп санаймын.

Жігітті жылы сөз ширатпайды, қатты сын ширатады.

Адам өзінің жанын ұсақ уайым, болымсыз қам-қаракет дертімен былғанудан сақтауы керек.

Тартыспен түскен, бейнетпен келген жақсылық қана - шын мәнінде қымбат табыс.

Адам баласының жаман құлқы - жаратылысынан емес, өскен ортасында көрген үлгі-өнегесінен.

Біз кейінгі буынға тәлім бермесек - ел болғанымыздың мәнісі не?

Мұғалімнің ұдайы жақсы оқитын балаларға ғана сүйсініп, ылғи соларды ғана оқытуы дұрыс емес.

Тумай жатып - толдым демеймін, толмай жатып - болдым демеймін.

Қызғаныш - құрт ауруы, мыс қазанда қайнайтын азап оты.

Халық пен халықты, адам мен адамды теңестіретін нәрсе - білім.

Адамшылықты тез жүргізу үшін көп ой керек, ойлау үшін оқу керек.

Жау десе - жалынбаймын, дос десе - тарылмаймын.